A Xunta inviste 4,2 M€ nun novo programa de axudas para a contratación de 200 persoas desempregadas menores de 29 anos en organismos intermedios

A Xunta convocou no Diario Oficial de Galicia (DOG) un novo programa de axudas da Xunta dirixido á contratación de persoas desempregadas de entre 18 e 29 anos en organismos intermedios sen ánimo de lucro que se atopen inscritos no correspondente rexistro e dispoñan dun centro de traballo na comunidade galega.

Así, poderán acceder a estes novos apoios autonómicos da Consellería de Promoción do Emprego e Igualdade (poden solicitarse ata o próximo 27 de febreiro) asociacións empresariais sectoriais ou intersectoriais, incluídas as de carácter tecnolóxico; consellos reguladores de denominacións de orixe protexidas, de indicacións xeográficas protexidas e de agricultura ecolóxica; agrupacións industriais empresariais (con personalidade xurídica propia, sen ánimo de lucro e domiciliadas en Galicia), que representen a un colectivo de empresas galegas; clústeres empresariais; ou asociacións de persoas autónomas.

A Xunta estima que se poidan contratar a través desta iniciativa unhas 200 persoas mozas desempregadas, sempre que estean inscritas no ficheiro do Sistema Nacional de Garantía Xuvenil no ámbito de Galicia. O programa, que conta cun orzamento superior aos 4,2 millóns de euros, ten por obxecto proporcionarlles unha experiencia e práctica profesional que facilite a súa inserción laboral. Os contratos terán unha duración de polo menos nove meses e a a xornada será a tempo completo.

A actuación forma parte do Plan Emprega Xuventude 2023 co que a Xunta está a impulsar o emprego entre a mocidade galega cun investimento próximo aos 30 millóns de euros para formar e incrementar as oportunidades laborais duns 2.000 galegas e galegos.