A clave de Chave365 ten unha validez dun ano, sendo necesario que se renove polo menos unha vez ao ano. O sistema envía o SMS cando a clave está a piques de caducar, polo que deberás cambiala o antes posible. Na sección “Cambios de clave posteriores ao primeiro acceso” detállase paso a paso como levar a cabo esta renovación/modificación da clave.

No caso de que esquezas a clave de acceso ou a teñas caducada, podes recuperala dende a app XuntaEu ou ben a partir da “Área Privada" da sede electrónica, xusto debaixo do espazo para poñer o teu contrasinal:

Premendo nesta opción solicitarache que indiques o teu DNI/NIE e o teu número de teléfono asociado ao teu usuario de Chave365:

Tras premer en “Validar” recibirás unha nova clave provisional dun só uso que deberás cambiar a seguinte vez que accedas con Chave365. Na sección "Cambio de clave no primeiro acceso" tes o paso a paso de como podes modificala.

Outras opcións para recuperar a clave son:

• Certificado dixital, DNI electrónico ou Cl@ve, accedendo ao teu perfil de Chave365.
• Por videoidentificación, cubrindo o formulario de Chave365 dentro do Asistente en liña de administración electrónica. Enviado o formulario, o persoal técnico remitirache as instrucións para facer a videoidentificación e, unha vez finalizada e validada, será remitida a nova clave ao teléfono móbil que teñas definido/asociado ao teu usuario.
• Presencialmente, nalgún dos órganos ou unidades administrativas da Administración xeral e do sector público autonómico de Galicia que realizan as funcións de rexistro de usuarios de Chave365.