O presidente interveu ante os medios tras o retiro de traballo do Goberno galego que tivo lugar esta fin de semana en Meis (Pontevedra)
Rueda avanza que no 2026 estarán xa en marcha as 4.000 vivendas comprometidas para duplicar o parque público de Galicia e chegar así ás 8.000
Destaca que Galicia conta cun Goberno que “cumpre cos seus compromisos” e que “seguiremos apostando por esa Galicia Calidade da que cada vez máis galegos e galegas se poidan sentir orgullosos”
Sinala que a comunidade chegará en 2026 aos 100.000 dependentes atendidos e contará co primeiro centro de protonterapia da sanidade pública en España
No eido da I+G+i, a ciencia e innovación galega, crearase a Fundación Galtia e arrincará a Fábrica de Intelixencia artificial
Meis (Pontevedra), 16 de novembro de 2025
O presidente da Xunta, Alfonso Rueda, avanzou hoxe que no 2026 estarán xa en marcha as 4.000 vivendas comprometidas na actual lexislatura para duplicar o parque público de Galicia. Así, ás 3.000 que xa están en marcha en diferentes estados de execución, sumaranse antes de que remate o vindeiro ano outros 1.000 aloxamentos, dos que o 25% dos de venda e o 40% dos de alugueiro estarán reservados aos mozos e mozas de menos de 36 anos.
O presidente, que interveu ante os medios tras o retiro de traballo do Executivo autonómico que tivo lugar esta fin de semana en Meis, puxo en valor que Galicia conta cun “Goberno unido, que traballa coordinadamente” e que “somos un Goberno de palabra que cumpre cos seus compromisos”.
Tal e como indicou o presidente, nos dous últimos días o Executivo galego analizou a folla de ruta para o próximo ano, na que se reflicte unha forte aposta pola I+G+i, a ciencia e a Innovación galega. Neste eido, Rueda destacou que en 2026 se poñerá en marcha a Fundación Galtia, para atraer talento, e arrincarase coa Fábrica de Intelixencia Artificial. Ademais, a comunidade contará en 2026 co primeiro centro de protonterapia da sanidade pública en España.
Outro dos obxectivos para o vindeiro ano, segundo subliñou o presidente, é chegar aos 100.000 dependentes atendidos, se non o impide o recurso presentado polo Goberno central ao plan de choque para a dependencia impulsado pola Xunta, que supón un “risco certo de bloqueo”.
No ámbito normativo, está prevista a aprobación da primeira Lei de Educación Dixital e darase luz verde á nova Lei de Administración Local de Galicia. O presidente autonómico remarcou que 2026 será tamén o ano do Pacto pola Lingua e da renovación do Plan Xeral de Normalización da Lingua galega; e empezará a funcionar o Centro de Artes Dixitais.
En relación coa vivenda, a Xunta comezará a mercar locais en desuso para destinalos a vivenda e lanzaranse ademais axudas para rehabilitar vivendas destinadas a traballadores beneficiarios dos programas de captación de talento.
Segundo salientou Rueda, tras a plena asunción das competencias na xestión da costa, seguirase a construír o Camiño do Litoral, desde Ribadeo ata A Guarda. E no tocante á mobilidade e as infraestruturas, remataranse as obras das estacións intermodais da Coruña e de Lugo para a súa posterior entrada en funcionamento; e avanzarase nas vías de Alta Capacidade Tui- A Guarda; na Nadela- Sarria; na Brión- Noia; na da Costa da Morte; na Variante de Viveiro; e na vía rápida ata A Lanzada.
No que respecta á enerxía, a Xunta vai continuar co plan de repotenciación dos parques eólicos “se o Goberno central non o impide con ese recurso incomprensible que formulou para despois sacar unha normativa que reproduce practicamente o que nós queriamos facer aquí e non nos deixan”. Galicia busca reducir os aeroxeradores de máis de 2.500 a arredor de 700, ao tempo que se incrementa a xeración de enerxía un 35%.
Ademais, melloraranse as infraestruturas contra o lume con investimentos nas bases aéreas e máis medios aéreos. A comunidade seguirase abrindo ao turismo de calidade, segundo sinalou o presidente, quen apuntou que se poñerán en marcha novas iniciativas, como a regulación do turismo mariñeiro.
O presidente autonómico concluíu que ”o ano 2026 ten que ser un ano de moitísimo traballo, un ano grande, preludio dese ano enorme que ten que ser para Galicia o ano 2027, o ano Xacobeo”. Así, sinalou que “seguiremos apostando por esa Galicia Galidade da que cada vez máis galegos e galegas se poidan sentir orgullosos como eu me sinto orgulloso do Goberno galego”.
Imaxes relacionadas
