Club de fútbol galego de maior traxectoria deportiva

O fútbol foi introducido na Coruña en 1902 polo estudante galego en Inglaterra Xosé María Abalo e unha das súas primeiras organizacións na cidade é o Deportivo, creado o 2 de marzo de 1906 co nome de Club Deportivo da Sala Calvet. En 1909 o club adopta o título de real por concesión de Afonso XIII e pasa a chamarse como o coñecemos hoxe.

En 1941 ascende por primeira vez á Primeira División e durante varias décadas sobe e baixa de categoría. Ata 1992 en que, de novo ascendido, é o equipo revelación da Liga, logra a terceira praza e entra en nas competicións europeas. Coñecido a partir de entón co sobrenome de Súper Depor, o club colleita importantes éxitos: segundo posto na Primeira División en 1994, campión da Copa do Rei e da Supercopa de España en 1995, campión de Liga e da Supercopa de España en 2000, campión da Copa do Rei e da Supercopa de España en 2002...

O campo do club é o Estadio de Riazor, creado en 1944, cun aforo actual de 34.600 localidades. O Deportivo é o noveno club español por número de afeccionados e o noveno que conseguiu o campionato de Liga de Primeira División. Cos seus 25.000 socios e 177 peñas é unha das principais organizacións sociais galegas.