Medallas de Galicia

É contadora pública egresada da Universidade Nacional de Mar de Prata e presidenta e CEO de Álvarez Argüelles Hoteis, a cadea hoteleira de capital nacional con maior cantidade de propiedades en Arxentina, que conta con 70 anos de traxectoria, brindando servizos integrais de xerenciamiento hoteleiro en 13 establecementos en distintas cidades de Arxentina.

A súa xestión distinguiuse por conducir exitosamente a transición da empresa familiar cara á segunda xeración, preservando os valores fundacionais de excelencia no servizo mentres adaptaba o modelo de negocio aos cambios económicos, sociais e tecnolóxicos. Baixo o seu liderado, a compañía diversificou a súa estratexia mediante a incorporación do xerenciamiento de activos de terceiros e desenvolveu un programa de internacionalización que fortaleceu o seu posicionamento na industria.

Complementou a súa formación cun Programa de Especialización en Negocio Hoteleiro e Gastronómico en Glion Institute of Higher Education (Suíza), un Seminario de Hostalería e Alimentos e Bebidas no Centro Superior de Hostalería de Galicia, un Máster en Negocios de Materiabiz na Escuela de Negocios e a certificación Next Board da Universidade do CEMA (UCEMA).

Alén da súa actividade empresarial, participa activamente nos ámbitos corporativo e institucional. É directora titular de Santander Arxentina (desde marzo de 2024) e conselleira titular do Directorio de MAPFRE Arxentina (desde 2019).

Así mesmo, desempeña como vicecónsul honoraria de España en Mar do Prata (desde outubro de 2012), delegada da Cámara de Comercio Española da República Arxentina nesa cidade (desde a súa fundación en setembro de 2007), membro do International Women's Forum (desde decembro de 2023), vicepresidenta da Fundación Hospital Materno Infantil Victorio Tetamanti (FUNDAMI) da cidade de Mar de Prata (desde agosto de 2022) e membro da Comisión Directiva da Asociación Empresaria Arxentina (AEA) desde decembro de 2024.

Ao longo da súa traxectoria recibiu importantes recoñecementos pola súa contribución ao desenvolvemento empresarial e ao fortalecemento da empresa familiar. Entre eles destacan a Cruz de Oficial da Orde de Isabel a Católica, outorgada polo Rei de España en 2024; o Premio do Instituto Arxentino e Latinoamericano da Empresa Familiar por Traxectoria e Legado en 2022; o Premio Muller Empresaria Bonaerense de FEBA á Muller Empresaria Bonaerense en 2019; o Diploma Konex-diploma ao Mérito como Empresaria Peme en 2018 e o recoñecemento á Muller en Turismo outorgado pola Unión do Comercio, a Industria e a Produción (UCIP) de Mar de Prata en 2017.

En canto á súa vinculación con Galicia, a súa familia é da Provincia de Pontevedra, orixinaria de Salvaterra de Miño e das Neves. 

É licenciada en Dereito pola Universidade de Zúric e directora da Fiscalía de Menores do cantón de Argovia (Suíza), institución que lidera desde 2021. Especializada en dereito penal xuvenil, conta cunha sólida traxectoria na administración de xustiza suíza e é recoñecida polo seu compromiso coa protección da infancia e a adolescencia, así como pola súa contribución ao desenvolvemento deste ámbito do dereito.

Nada en Zúric, en 1977, é filla de emigrantes galegos.

Os seus primeiros anos de vida transcorreron en Carzoá (Cualedro, Ourense), xunto aos seus avós maternos, antes de regresar a Suíza coa súa familia. A súa familia paterna é de Arbo.

Creceu en Zúric profundamente vinculada ás súas raíces galegas, un vínculo que mantivo ao longo de toda a súa vida tanto no ámbito familiar como cultural.

Licenciouse en Dereito na Universidade de Zúric en 2003, compaxinando os seus estudos co exercicio profesional en distintos ámbitos xurídicos. Tras realizar prácticas no servizo xurídico do Ministerio de Facenda do cantón de Argovia e no Xulgado de Primeira Instancia de Baden, obtivo en 2005 a patente de avogada que a habilita para exercer a profesión en Suíza.

En 2006 incorporouse á Fiscalía de Menores do cantón de Argovia co propósito de especializarse en dereito penal xuvenil. Ese mesmo ano foi elixida fiscal de menores polo Parlamento cantonal de Argovia. En 2012 foi nomeada subdirectora da Fiscalía de Menores e, en 2021, elixida directora polo Parlamento de Argovia, responsabilidade desde a que dirixe a política de persecución penal xuvenil e coordina o traballo da Fiscalía de Menores do cantón.

O seu compromiso coa infancia e a xustiza xuvenil tamén se reflectiu na súa participación en diferentes organismos especializados. Entre 2007 e 2015 formou parte do padroado da Fundación St. Georg Jugenddorf Knutwil, dedicada á atención de menores, e entre 2016 e 2024 integrou a xunta directiva da Asociación Suíza de Dereito Penal Xuvenil.

Paralelamente á súa traxectoria profesional, Beatriz Gil mantivo unha estreita relación coa comunidade galega en Suíza. Desde a infancia forma parte da Asociación Cultural As Xeitosiñas de Zúric, onde comezou como bailarina e posteriormente foi gaiteira durante máis de dúas décadas. A entidade, continúa sendo un punto de encontro para varias xeracións da súa familia e un símbolo da preservación da cultura galega na emigración.

Nai de dous fillos, compaxina a súa responsabilidade a cargo da fiscalía coa súa vida familiar e conserva unha das súas grandes paixóns: a lectura, á que dedica o tempo que lle permite unha intensa actividade profesional. A súa traxectoria reflicte o equilibrio entre o servizo público, a excelencia xurídica e un profundo compromiso coas súas raíces e coa sociedade.

Xornalista de investigación e activista de Dereitos Humanos venezolana, española e estadounidense.

Relatora do Oslo Freedom Forum e os Hague Talks en Países Baixos.

Asesora de comunicacións para ONG centradas en crimes de lesa humanidade. Delegada por Venezuela no World Liberty Congress en Lituania e Alemaña. Enviada especial para cobertura da crise no medio oriente desde Israel e Marrocos.

En 2019, declarouse o "Día de Carla María Angola Rodríguez" en Miami e recibiu as chaves da cidade. En dúas ocasións, foi recoñecida polo alcalde de Miami como a xornalista e defensora de dereitos humanos, da democracia e a liberdade máis salientable.

É a xornalista latinoamericana máis seguida nas redes sociais con máis de 4 millóns de seguidores en Instagram e 2.8 millóns en X.

Con todo, mantén que o máis importante da súa traxectoria é ser a filla de Isaura Rodríguez Rodríguez, galega visionaria dunha aldea (ela di que de só 10 veciños) chamada A Piteira, do Carballiño, na provincia de Ourense. Grazas a ela empezou como pasante na primeira canle de televisión na que traballou en Venezuela e na que fixo unha carreira de 18 anos coa que iniciou todo o demais. 

É odontóloga, especialista en Ortodoncia e Harmonización Orofacial, con máis de dúas décadas de experiencia clínica, académica e de liderado institucional.

Brasileira e española, desenvolveu unha sólida traxectoria no ámbito da odontoloxía, combinando a excelencia asistencial coa investigación científica, a xestión empresarial e o compromiso social.

Graduouse en Odontoloxía pola Universidade Estácio de Sá do Río de Janeiro (1998-2002) e posteriormente obtivo un Máster en Ortodoncia en São Leopoldo Mandic concluído en 2019, onde investigou a caracterización micromorfológica e mecánica de mini implantes ortodónticos. Ademais, especializouse en Ortodoncia en FAISA en 2011, en Harmonización Orofacial en FAIPE concluído en 2018 e en Odontopediatría no Centro de Pós-Graduação São Leopoldo Mandic - Campinas complementando a súa formación con numerosos cursos de actualización e perfeccionamento, incluíndo programas internacionais na New York University College of Dentistry (NYU).

Desde 2005 é socia e directora de clínicas odontolóxicas no Río de Janeiro, onde lidera equipos multidisciplinarios e ofrece tratamentos especializados en ortodoncia e estética facial. Anteriormente formou parte do corpo odontolóxico da Mariña do Brasil como dentista do Quadro RNR, segunda tenente de Reserva (2004-2007) e desenvolveu a súa actividade profesional en institucións públicas e privadas, consolidando unha ampla experiencia clínica e de xestión.

O seu interese pola investigación levouna a publicar traballos científicos en revistas internacionais especializadas. Así mesmo, participa de xeito constante en congresos nacionais e internacionais, manténdose á vangarda das innovacións na súa especialidade.

Paralelamente á súa actividade profesional, Camila desempeñou importantes funcións de liderado en organizacións empresariais, sociais e profesionais. Foi presidenta da Asociación Brasileira de Empresarios Españois e Galegos (ABREME-AEGAL) de 2016 a 2018 e de 2019 a 2022, vicepresidenta e presidenta electa do Rotary Club Ipanema, directora clínica de Special Olympics (desde 2017) e fundadora, directora e responsable técnica do proxecto social Sorriso do Bem no Rotary Ipanema, iniciativa que proporcionou atención odontolóxica a máis de 2.000 pacientes (desde 2013).

Actualmente preside a Comisión de Proxectos Sociais do Consello Rexional de Odontoloxía do Río de Janeiro (CRO-RJ).

O seu labor foi recoñecido coa Medalla Chiquinha Gonzaga, outorgada pola Cámara Municipal do Río de Janeiro en 2024.

Alén da súa carreira profesional, Camila Fernández Ferreira sobresaíu no deporte de alto rendemento como deportista en vela.

En canto á súa vinculación con Galicia, a súa familia é de Xinzo de Limia e do Castro de Caldelas.