Juan Pardo Suárez
Este cantante, nado en Palma de Mallorca en 1942 pero criado en Ferrol, formou parte de varios dos grupos máis rompedores na década de 1960: Teleko, Los Pekenikes, Los Brincos e Juan y Junior.
En 1969 comezou unha prolífica carreira en solitario, na que interpretou cancións que son auténticos himnos, como "Bravo por la música", "No me hables", "Amar después de amar" ou "Gallo de pelea".
O éxito a nivel nacional non o fixo xamais despegarse de Galicia. Ademais da inmortal "Anduriña" que lanzou xunto a Junior a finais dos 1960, rompeu moldes ao publicar en 1976 un disco integramente en galego "Galicia, miña nai dos dous mares", musicando poemas de Cabanillas ou Pondal.
Juan Pardo sacou o seu último disco en 2003 e desde entón vive unha vida tranquila e afastada dos focos, centrada noutra das súas paixóns: a pintura.
Carlos Núñez Muñoz
Vigués de 1971, é un erudito da cultura celta, que está presente en toda a súa obra musical e mesmo no seu libro "La hermandad de los celtas".
Nunha actuación no auditorio de Castrelos foi descuberto por The Chieftains, e con eles comezou a súa carreira musical.
En 1996 publicou o disco "A irmandade das estrelas", que supuxo o boom da música celta en España. Ao igual que Luz Casal, participou na banda sonora de "Mar adentro".
Carlos Núñez é un dos máis salientables embaixadores da música galega no mundo enteiro, cun toque innovador. No ano 2013 recibiu a medalla Castelao.
María Luz Casal Paz
Nada en Boimorto en 1958, en 1982 gravou o seu primeiro LP, chamado coma ela: "Luz". Aí despegou unha longa carreira musical durante a que vendeu máis de cinco millóns de copias dos seus traballos.
As súas cancións son xa parte da biografía de moitos españois, con cancións como "Rufino", "No me importa nada" ou "Sencilla alegría".
A súa carreira musical entrelazouse en moitas ocasións co cinema. Con "Tacones lejanos", de Almodóvar, chegou o renome internacional para a súa canción "Piensa en mí", en 2001 obtivo o Goya pola canción de “El bosque animado" e a súa versión do "Negra sombra" foi o tema principal de “Mar adentro", de Amenábar.
É a impulsora do Festival de la Luz, que se celebra cada ano en Boimorto, e obtivo importantes recoñecementos, como a Medalla Castelao en 2010 e, o último deles, ser Comendadora das Artes de Francia, este mesmo ano.
